खाँदबारी नगरको प्रमुखका उम्मेदवार महेश थपलिया भन्छन्, ‘नगरभरी सडकले जोड्नेछु’ (अन्तर्वाता)
संखुवासभा, ९ असार । नेपाली कांग्रेसले संखुवासभाको सदरमुकाम खाँदबारी नगरपालिकामा महेश थपलियालाई प्रमुखको रूपमा अघि सारेको छ । विगत ३० वर्षदेखि पार्टी संगठनको महत्वपूर्ण जिम्मेवारीमा रहेर काम गरेका थपलिया बौद्धिक र मिलनसार नेताको रूपमा चिनिन्छन् । थपालिया राजनीतिक रूपमा मात्र नभई समाजिक क्षेत्रमा पनि उत्तिकै सक्रिय छन् । उनी पारिवारिक लिगेसीसमेत जोडिएको परिवारका सक्रिय राजनीतिकर्मी हुन् । स्नाकोत्तरसम्मको अध्ययन गरेका थपलियाले संखुवासभामा पत्रकारिताको जग बसाउनसमेत महत्वपूर्ण भूमिका खेलेका थिए ।
थपलिया विद्यार्थी राजनीतिबाट पार्टी राजनीतिमा सक्रिय भएका हुन् । उनी २०३९ सालमा आरआर क्याम्पसमा नेविसंघ एकाइ सदस्य, २०४३ मा एकाइ उपसभापति हुँदै २०४४ मा स्ववियु उपसभापतिको प्रत्यासी बनेका थिए । उनलाई २०४८ मा संघको केन्द्रीय सदस्य हुँदै केन्द्रीय कार्यालय सचिव र केन्द्रीय समिति प्रवक्ताको जिम्मेवारी सम्हाल्ने अवासर प्राप्त भयो । उनले व्यवस्था परिवर्तनका आन्दोलनमा पटक पटक गिरफ्तार भई बन्दी जीवन बिताउनुप¥यो ।
लामो समयदेखि पार्टीको महाधिवेशन प्रतिनिधि र महासमिति सदस्यको जिम्मेवारी बहन गर्दै आएका थपालिया हाल पार्टीको महासमिति सदस्य छन् । थपलियाले नेपाली कांग्रेसको सिद्धान्त, निष्ठा र वैचारिक धरातललाई फराकिलो बनाउँदै नगरबासीको सुख दुःखमा साथ दिँदै आएका थपलियासँग गरिएको कुराकानीः
१) चुनाव नजिकिएसँगै घरदैलो अभियान कस्तो चलिरहेको छ ?
– नेपाली कांग्रेसका नेता, भ्रातृ तथा शुभेच्छुक संस्थाका सााथीहरू, युवा महिला, दलित, अल्पसंख्यक, पिछडिएका वर्ग र तहका साथीहरूलाई साथमा लिएर जनताका घरदैलोमा आफ्नो चुनावी एजेन्डासहित उपस्थित भइरहेको छु । स्थानीय तहको निर्वाचनमा नेपाली कांग्रेसको पक्षमा जनलहर बढेको पाएको छु । त्यसमा पनि नेपाली कांग्रेसको नेतृत्वमा बनेको संविधान कार्यान्वयन र प्राप्त उपलब्धिको रक्षा नेपाली कांग्रेसले मात्र गर्न सक्छ भन्ने कुरामा जनता सचेत छन् । त्यसैले नेपाली कांग्रेसप्रति जनताको अगाध स्नेह र विश्वास रहेको पाएको छु ।
२) घरदैलो अभियानका क्रममा नगरबासीको चाहना के कस्तो पाउनुभयो ?
– बीस वर्षपछि भएको आसन्न स्थानीय तहको निर्वाचनमा जनताले विकास खोजेका छन् । जनप्रतिनिधिविहीनताको अवस्थामा जनताले आफ्ना समस्या र भावना बुझ्ने, निष्ठा र प्रतिष्ठासहितको दुरदृष्टि राख्न सक्ने सक्षम नेतृत्व चाहेका छन् । नगरको सहरी भाग र ग्रामीण भेगमा आ–आफ्नै समस्या छन् । सहरमा उचित ढलनिकास, सडक, व्यवस्थित विद्युतीकरण र शुद्ध खानेपानीको व्यवस्थापनको अपेक्षा जनप्रतिनिधिसँग राखेको पाइन्छ । यसैगरी, ग्रामीण भेगमा खानेपानी, विद्युत, सडकलगायत कृषि र पर्यटन पूर्वाधारको विकासमा जोड दिएको पाइन्छ । यसका साथै शिक्षा, स्वास्थ्य र रोजगारीमा सहज पहुँचको बढी आस राखेका छन् ।
३) जनताले राखेका आशा र अपेक्षालाई पूरा गर्ने तपाईसँग के–कस्ता कार्ययोजना छन् ?
– खाँदबारी नगरपालिका जिल्लाको पहिलो नगरपालिका भए पनि यहाँभित्र धेरै समस्या छन् । अहिले पनि बजार क्षेत्रका केही मूल सडकबाहेक अन्यत्र क्षेत्रमा वर्षात्को समयमा यातायात सेवा अवरुद्ध हुने गरेको छ । त्यसैले नगरका प्रत्येक वडाका बस्तीलाई व्यवस्थित सडकले जोड्ने मेरो पहिलो प्राथमिकता हुनेछ । त्यसपछि नगरपालिकाभित्र विकराल समस्याको रूपमा रहेको खानेपानी समस्या समाधान गर्न अहिले सञ्चालित योजनाहरू व्यवस्थित गर्ने, नगरभित्र प्रत्येक वडामा भएका पानीका मुहानहरूको संरक्षण गर्ने, विद्युतीकरण, टेलिफोन सेवा र सूचना प्रविधिले युक्त नगरपालिका बनाउनेछु ।
बजारका साथै ग्रामीण क्षेत्रको सडकको स्तरोन्नति र ढलनिकासलगायत सरसफाइको कार्यलाई प्रमुख प्राथमिकता दिनेछु । पर्यटन पूर्वाधार विकासका लागि पूर्वको प्रसिद्ध तीर्थस्थल मनकामना धामलाई पर्यटनको प्रमुख गन्तब्यस्थलका रूपमा स्थापित गराउन पहल गर्नेछु । सभाखोला आसपासका क्षेत्रमा पार्किङ, गार्डेनिङसहित स्विमिङ, फिसिङलगायतका मनोरञ्जन लिन सकिने स्थानको रूपमा विकास गर्नेछु । त्यसैगरी, छ्यांकुटीमा भ्युटावर स्थापना, सेकाहा पामालाई इको टुरिज्मको रमणीयस्थलको रूपमा विकास गर्दै होमस्टे र प्याराग्लाइडिङको सुविधामार्फत बाह्य तथा आन्तरिक पर्यटनलाई प्रवद्र्धन गर्न तत्काल पूर्वाधार तयार गरी काम अघि बढाउने छु ।
४) अहिले सहर अस्तव्यस्त छ, यसलाई व्यवस्थित गर्ने तपाईंसँग कस्तो रणनीति छ ?
– जनप्रतिनिधि नहुँदा विकास निर्माणका धेरै काम अव्यवस्थित भएका थिए । जथाभावी घर संरचनाहरू निर्माण हुँदा सहर झन् झन् कुरूप र अव्यवस्थित बन्दै गएको छ । साना सडकमा जथाभावी राखिएका निर्माण सामग्री र सवारीसाधनले आवतजावतमा ठूलो समस्या भइरहेकाले मेरो पहिलो प्राथमिकता भनेको भवन निर्माण आचार संहितालाई पूर्णरूपमा लागू गर्ने, ठूला र साना सवारीसाधनका लागि छुट्टाछुट्टै बसपार्क, ट्याक्सी स्ट्यान्डहरू बनाउने व्यवस्था गर्नेछु । सूचना र सञ्चारको सुविधालाई थप प्रभावकारी र बनाउन खाँदबारी नगरपालिकाका महत्वपूर्ण स्थलहरूलाई फ्रि वाईफाई जोनको रूपमा विकास गर्नेछु ।
५) तपाई निकै लोकप्रिय नेता हुनुहुन्छ, तपाईसँग युवा, वृद्धवृद्धा र असहायका लागिका लागि के कार्यक्रम छन् ?
– युवा देशका कर्णधार हुन् । बेरोजगारीको समस्याबाट ग्रसित युवा पुस्ता आज संखुवासभाबाट सयौंको संख्यामा विदेश पलायन भइरहेका छन् । उनीहरूलाई व्यावसायिक कृषितर्फ आकर्षित गर्न सुलभ मूल्यमा मलबीउको उपलब्धता, कृषि अनुदान र व्यावसायिक तालिमको व्यवस्था गरिने छ । कृषियोग्य जमिनमा सिँचाइको व्यवस्था गरी व्यावसायिक कृषि पशुपालन र तरकारी खेतीमार्फत कृषकहरूको जीवनस्तर उकास्न पहल गर्नेछु । खेल क्षेत्रको विकासका लागि सुविधा सम्पन्न खेलमैदान र कभर्ड हलको निर्माण गर्न पहल गर्नेछु । त्यसैगरी हामिलाई मार्गदर्शन गर्नुहुने नगरभित्रका समस्त वृद्धवृद्धाहरूको सुखद् जीवनयापनका लागि नगरभित्र व्यवस्थित वृद्धाश्रमको निर्माण गर्न पहल गर्नेछु ।
६) पछिल्लो समय भ्रष्टाचार व्याप्त छ, भ्रष्टाचाररहित नगरपालिका बनाउने तपाईको योजना के छ ?
– सिंहदरबारको अधिकार जनताको घरदैलोमा पुयाउने भनेर सरकारले विभिन्न संरचनालाई जनउत्तरदायी र पारदर्शी बनाएको छ । विकास निर्माणदेखि नगरपालिकाले गर्ने हरेक गतिविधिलाई अब जनताले नजिकबाट नियाल्न सक्नेछन् । संविधानमै उत्तरदायी जनप्रतिनिधिमार्फत जनसहभागितामूलक विकासमा जोड दिएको छ । योजना निर्माण गर्ने, कार्यान्वयन गर्ने र अनुगमन गर्नेलगायत समृद्ध नागरको खाका कोर्नेसम्मको अधिकार जनप्रतिनिधिमै हुने भएकाले जनताप्रतिले आफ्नो जवाफदेहितालाई कहिल्यै बेवास्ता गर्न मिल्दैन । विकास निर्माण, अनुगमन र सेवा प्रवाहको अवस्थाका बारेमा पनि जनप्रतिनिधि र नगरवासीले निरन्तर ‘वाच डग’ को रूपमा काम गर्न सक्ने भएकाले अब भ्रष्टाचार स्वस्फूर्त रूपमा नियन्त्रण हुन्छ ।
Comments
अरु समाचार
-
‘राजनीतिक स्थायित्वका लागि निर्वाचन प्रणालीमा सुधार गर्नुपर्छ’
काठमाडाैं । हाल अभ्यासमा रहेका राजनीतिक व्यवस्थामध्ये सबैभन्दा उत्कृष्ट व्यवस्था नै संसदीय शासन प्रणाली हो । यो व्यवस्थालाई समावेशी बनाउन...
-
‘सरकारमा भन्दा कानुन निर्माणमा साझेदारी चाहिन्छ’
काठमाडौँ । पछिल्ला वर्षहरूमा सत्ता साझेदारीमा भएको फेरबदलले कानुन निर्माण प्रभावित भएको छ । राजनीतिक दलको अभ्यास गठबन्धन सरकार बनाउने,...
-
अन्तर्राष्ट्रिय महिला दिवसः सोचमा परिवर्तन आवश्यक
काठमाडौं । “मेरो बुबाले मेरी मानसिक असन्तुलन भएकी आमा र म जस्तै फरकरुपमा सक्षम (अपाङ्गतासँग रहेको) मेरी बहिनी र मलाई...
-
सरकार र संसद्को काम गर्ने तौरतरिका पुरानै ढाँचाको भयो : सांसद घर्ती
काठमाडौँ । सङ्घीय लोकतान्त्रिक गणतन्त्रात्मक शासन व्यवस्थाको माध्यमबाट सुशासन, विकास र समृद्धिको आकाङ्क्षा पूरा गर्न संविधानको परिधिभित्र रहेर सबै...
-
सकिएकै हो त इतिहास अध्ययनको औचित्य ?
काठमाडौं । असाध्यै उपेक्षित विषय हुन पुगेको छ, यतिखेर इतिहास विषय । हुन त त्रिभुवन विश्वविद्यालयकै मानविकी तथा सामाजिकशास्त्र सङ्कायको...
-
सदनमा सांसदले बोल्ने स्वतन्त्रता हुनुपर्छ : सांसद गङ्गा यादव [अन्तर्वार्ता]
काठमाडौं । संसद् भनेको जनताको कुरा राख्ने प्रभावकारी थलो हो। तर, सदनमा देशका महत्वपूर्ण विषयमा सांसदले स्वतन्त्र रुपमा आफ्नो कुरा...
-
जाडोमा मुटुको सुरक्षा किन र कसरी: मुटुरोग विशेषज्ञ डा. ओममूर्ति अनिल
काठमाडौं । जाडो मौसममा तापक्रम घट्दा स्वास्थ्यसम्बन्धी विभिन्न समस्या आउँछन् । जाडोमा हाम्रो शरीरका मुटु, मस्तिष्क तथा फोक्सो बढी जोखिममा...
-
‘सरकार सदनप्रति उत्तरदायी भएमात्र संसद्को भूमिका प्रभावकारी बन्छ’
सभामुख देवराज घिमिरेले संसद्को भूमिकालाई प्रभावकारी बनाउन सरकार संसद्प्रति उत्तरदायी हुन आवश्यक रहेको बताएका छन् । उनले राज्यका कानूनमा...
-
नेपालमा जनसङ्ख्या – ‘पोलिसी डिपार्चर’ को उपयुक्त समय (विचार)
काठमाडौं । एसियाका अन्य देशमा जस्तै नेपालमा पनि जनसङ्ख्या वृद्धि मुख्य समस्याका रुपमा रहेको लामो समय प्रचार गरियो । देशको...