ताजा समाचार

महराले बयानमा भने- रोशनीसँग पारिवारिक सम्बन्ध

निवर्तमान सभामुख कृष्णबहादुर महराले आफ्नो प्रारम्भिक बयानमा संघीय संसद्की कर्मचारी रोशनी शाहीसँग पारिवारिक सम्बन्ध रहेको बताएका छन्।

गत १९ असोजमा पक्राउ परी हिरासतमा रहेका उनले पारिवारिक सम्बन्धका कारण रोशनीको घरमा आउजाउ हुने गरेको स्वीकारेका खबर आजको राजधानी दैनिकमा सविन शर्माले लेखेका छन्।

सरकारी वकिलको कार्यालय स्रोतका अनुसार महराले घटना घटेको दिन आफू रोशनीको कोठामा पुगेको स्वीकारेका छन् । उनले आफू त्यहाँ पुगे पनि सञ्चारमाध्यमबाट बाहिर आएजस्तो आफूले जबर्जस्ती करणीको प्रयास नगरेको बताएका छन्।

‘पारिवारिक सम्बन्धका आधारमा आफ्नो आउजाउ रहेको कुरा उहाँले बताउनुभएको छ,’ स्रोतले भन्यो, ‘तर, बयान सकिएको छैन, बयान पूरा भए पछि सोहीनुसार मुद्दा अघि बढाइनेछ।’

बलात्कार प्रयास गरेको आरोपमा आइतबार पक्राउ परेका महरालाई बयानका लागि बिहीबार सरकारी वकिलको कार्यालयमा उपस्थिति गराइएको थियो । सरकारी वकिल कार्यालयको रोहवरमा प्रहरीले महराको बयान लिएको हो।

महराले आफूलाई जबर्जस्ती बलात्कार गरेको आरोप लगाएकी शाहीले यसबीचमा पटकपटक आफ्ना भनाइ बदल्दै आइरहेकी छन् । यद्यपि, प्रारम्भमा महानगरीय प्रहरी वृत्त बानेश्वरले अनुसन्धान सुरु गरेको यस घटनाबारे अहिले काठमाडौं परिसरले अनुसन्धानको प्रक्रिया अघि बढाइरहेको छ।

प्रहरीका अनुसार घटनाबारे अनुसन्धान र आरोप लागेका महराको बयान भइरहेको छ । यो प्रक्रिया सकिएपछि सोमबार या मंगलबार महराविरुद्ध जबर्जस्ती करणीको मुद्दा अदालतमा दर्ता हुनेछ।

Comments

अरु समाचार

© NewsNepal 2018 - All Right Reserved.
news-nepal.com 2017.hlon.org