ताजा समाचार

अस्पतालबाटै प्रधानमन्त्रीको भिडियो सन्देशः म ठिक हुँदैछु

काठमाडाैं । प्रधानमन्त्री केपी शर्मा ओलीले आफू निको हुँदै गएको जनाएका छन् ।

अस्पतालबाट भिडियो सन्देश संप्रेषण गर्दै प्रधानमन्त्री ओलीले आफूले साग गेम पुरै हेरेको र समाचार आफै पढ्न सक्ने अवस्थामा रहेको जानकारी दिएका छन् ।

रोग अप्रत्यासित रुपमा आइलाग्ने कुरा भएको भन्दै उनले आफ्नो एपेन्डिसाइटिसको अपरेशन पश्चार पेटमा समेत समक्रमण भएकाले हप्ता दश दिन लागेको जनाएका छन् । यस्तै, उनले साग प्रतियोगिता सुरु भएकामा खुशी व्यकत गर्दै राष्ट्रपति र सहभागी सबैलाई धन्यवाद ज्ञापन गरेका छन् ।

उनले सन्देशमा भनेका छन्, ‘मैत्रीपूर्ण खेलबाट देशको इज्जत अगाडि बढाउन र क्षेत्रीय मित्रता अगाडि बढाउन म नेपाली खेलाडीहरु र सार्क क्षेत्रका खेलाडीहरु, सबैलाई आग्रह गर्दछु ।’

भिडियो सन्देशको पूर्णपाठः

एपेण्डीसाइटिस भनेको कसैलाई समय र सूचना दिएर आउने रोग होइन । यो अचानक आइलाग्छ । मलाई पनि अप्रत्यासित रुपमा त्यसैगरी आइलाग्यो । त्यसमा इन्फेक्सन भएछ । र, त्यो बाहिर पनि फैलिएछ । त्यसमा मात्रै इन्फेक्सन सिमित भएको भए निकालेर फाल्न सजिलो हुन्थ्यो । बाहिर पनि इन्फेक्सन भएको हुनाले त्यो इन्फेक्सनलाई पनि हटाउनु पर्यो। त्यस कारण उपचारका क्रममा हप्ता दश दिन लाग्ने भयो । तर, मेरो स्वास्थ्य राम्ररी सुधार भइराख्या छ । एउटा मेजर अपरेशनपछि तपाईंहरु देखिरहनु भएको छ– मेजर अपरेशनपछि पनि म उठेर बोल्न सक्ने, साथीहरुसँग कुरा गर्न सक्ने अवस्थामा छु र समाचारहरु हेर्न सक्ने अवस्थामा छु ।

हिजो मैले १३ औं ‘साग’को उद्घाटन समारोह पनि पूरै हेरेँ । हुन सक्छ कि सक्दैन भन्ने द्विविधा समाप्त भएकामा खुसी लाग्या छ । म राष्ट्रपतिज्यूलाई उद्घाटन गरिदिनु भएकोमा, अरु सबैलाई सहभागि हुनु भएकोमा धन्यवाद भन्न चाहन्छु । मैत्रीपूर्ण खेलबाट देशको इज्जत अगाडि बढाउन र क्षेत्रीय मित्रता अगाडि बढाउन म नेपाली खेलाडीहरु र सार्क क्षेत्रका खेलाडीहरु, सबैलाई आग्रह गर्दछु ।’

–केपी शर्मा ओली
प्रधानमन्त्री
(मनमोहन कार्डियोथोरासिक भास्कुलर तथा ट्रान्सप्लान्ट सेन्टरको आईसीयू कक्षबाट)

भिडियोः

Comments

अरु समाचार

© NewsNepal 2018 - All Right Reserved.
news-nepal.com 2017.hlon.org